मोरङ पथरीमा सुकुम्बासीले जलाए तीनवटा गाडी

१८ जना आन्दोलनकारी सुकुम्बासी पक्राउ २३ वैशाख, मोरङ । बन्दको अवज्ञा गरेको भन्दै आन्दोलनकारी सुकुम्बासीहरुले मोरङको पथरीमा मंगलबार दिउँसो तीनवटा गाडीमा आगजानी गरेका छन् । आगजानीबाट तीनवटै सवारी साधन जलेर ध्वस्त भएका छन् । आन्दोलनकारीहरुले पूर्व जाँदै गरेको मे १ ख ९२४ नम्बरको मुनाल यातायातको बसमा पथरी नजिकैको खोला छेउमा रोकेर आगो लगाएका छन् । आगलागीबाट वस जलेर धस्त भएको छ । त्यसैगरी आन्दोलनकारीहरुले पश्चिमतर्फ जाँदै गरेको ग १ ख ४१०९ नम्बरको यात्रुबस र मे १ ख ११५६ नम्बरको ट्रकमा आन्दोलनकारीले इलाका प्रहरी कार्यालय अगाडि जलाएका छन् । \



]बस जलेर पुरै क्षति भएको छ भने ट्रकमा रहेका सामान पनि जलेर नष्ट भएका छन् । सुकुम्बासीहरुलाई जग्गा धनीपूर्जा उपलब्ध गराउनुपर्ने माग राखेर आन्दोलन थालेका सुकुम्वासी संघर्ष समितिले बुधबार मोरङ बन्दको आहृवान गरेको थियो । बुधबार बिहान सडक अवरुद्ध गर्न निस्केका आन्दोलनकारी र प्रहरीबीच झडप भएको थियो । झडपमा प्रहरी जवानहरू टंक बिक, दीपेन्द्र महतो र विष्णु कार्की घाइते भएको प्रहरीले जनाएको छ ।

प्रहरीले सुकुम्बासी संघर्ष समितिका अध्यक्ष जहरमान लिम्बूसहित १८ जनालाई पक्राउ गरेको छ । पक्रउ पर्नेमा शनिश्चरे-९ का गणेश खड्का, हसन्दह-९ का डम्बर थापा, शनिश्चरे-१ का अमृत लिम्बू, नारायण राई, सञ्जय राई, मानबहादुर बस्नेत, टंक घिमिरे, इन्द्रवहादुर डाँगी, शनिश्चरे-३ का हस्त साँवा, शनिश्चरे-७ का दिवश पुरी, सुकनारायण पौडेल छन् । त्यसैगरी बयरबन-६ का अमृत लिम्बू, बयरवन-७ का टंक राई, बुद्धिराज माझी, बयरवन-८ का टंक पाठक, राजकुमार लिम्बू, डाँगीहाट-५ का भरत मैनाली रहेका छन् । सवारी साधनमा आगजानी पश्चात पथरी तनावग्रस्त भएको छ । आन्दोलनकारीलाई नियन्त्रणमा लिन सयौं सुरक्षाकर्मी परिचालन गरिएको छ । प्रहरीले पथरी चोकमा पनि सर्वसाधरणलाई बस्न दिएको छैन । पूर्व पश्चिम राजमार्गमा सवारी आवागमन ठप्प छ ।